Bruno Fernandes ya bayyana farin cikinsa bayan lashe kyautar Sir Matt Busby Player of the Year karo na biyar a tarihin rayuwarsa tare da Manchester United.
Tauraron dan wasan na Portugal ya sake kafa tarihi a kungiyar bayan ya zarce tsofaffin yan wasan kungiyar irin su David De Gea da Cristiano Ronaldo wajen yawan lashe wannan kyauta da magoya baya ke zaɓa.
An gabatar da kyaututtukan ne a filin atisayen kungiyar na Carrington, inda aka raba kyautuka daban-daban ga fitattun yan wasa a bangarori daban-daban.
Bruno Fernandes Ya Nuna Godiya Ga Magoya Bayan Manchester United
Yayin wata hira da aka yi da shi a shirin Inside Carrington, Bruno Fernandes ya bayyana cewa wannan kyauta tana da matuƙar muhimmanci a gare shi saboda daga hannun magoya baya take fitowa.
Yace yana matuƙar godiya ga masoya kungiyar saboda yadda suke cigaba da nuna goyon baya da kuma yarda da yan wasan kungiyar duk da lokuta masu wahala.
Bruno ya bayyana cewa:
Muna taka leda ne domin magoya bayanmu da kuma wannan kulob. Samun wannan kyauta daga gare su abu ne mai matuƙar muhimmanci a gare ni.
Ya kara da cewa babban abin da magoya baya suke bai wa yan wasan shine ƙwarin gwiwa da imanin cewa zasu iya cimma manyan abubuwa tare da kungiyar.
Babban Burin Manchester United A Bana
Tsohon tauraron na Sporting CP ya bayyana cewa babban burin kungiyar tun farkon kakar wasa shine komawa gasar UEFA Champions League.
Yace kungiyar bata taɓa ɓoye wannan buri ba, domin Manchester United kulob ne da aka saba gani yana fafatawa a manyan gasa a Turai.
Bruno Fernandes ya kuma yabawa sauran yan wasan kungiyar saboda rawar da suka taka a kakar bana.
A cewarsa, akwai lokuta masu kyau da kuma masu wahala a kakar, amma yan wasan sunyi iya ƙoƙarinsu wajen taimakawa kungiyar.
Farin Cikin Komawa Champions League
Dan wasan na Portugal ya bayyana farin cikinsa game da dawowar Manchester United zuwa gasar Champions League.
Ya ce:
Lokaci mai tsawo bama cikin Champions League, kuma wannan ba irin matsayin da aka saba gani Manchester United bane.
Bruno ya bayyana cewa duk wani dan wasan da yazo Manchester United yana son taka leda a manyan gasa tare da fafatawa da manyan kungiyoyin Turai.
Yace samun damar buga wasa da mafi kyawun kungiyoyi a Turai a kakar wasa mai zuwa babban abu ne ga kungiyar.
Sakon Bruno Fernandes Ga Magoya Bayan Kungiyar
A karshe, Bruno Fernandes ya aika sakon godiya ga magoya bayan Manchester United saboda irin goyon bayan da suka nuna wa kungiyar a duk tsawon kakar bana.
Yace akwai lokuta masu wahala da kungiyar ta shiga, amma duk da haka magoya bayan sunci gaba da nuna soyayya, goyon baya da kuma imani da kungiyar.
Babban godiya gare su saboda duk abinda suka yi mana a wannan kakar. Sun kasance tare da mu a ko da yaushe.
Bruno ya kuma bayyana fatan kungiyar zata kawo karshen kakar wasa cikin farin ciki tare da ci gaba da shirye-shiryen kakar wasa mai zuwa.
