Shugaban ƙungiyar FC Barcelona, Joan Laporta, ya sanar da murabus dinsa a hukumance a ranar Litinin domin ya ba kansa damar tsayawa takarar sake zama shugaban kulob ɗin a zaɓen da ke tafe.
Bayan murabus ɗinsa, Rafa Yuste ya karɓi ragamar shugabancin ƙungiyar a matsayin shugaban rikon ƙwarya, wanda zai ci gaba da tafiyar da al’amuran kulob ɗin har sai an kammala zaɓen sabon shugaba.
Laporta ya ziyarci dakin sauya kaya
Saboda ranar hutun yan wasa ce, Laporta bai samu damar yin bankwana da yan wasan Barcelona a ranar murabus ɗinsa ba. Sai dai a ranar Talata ne ya je Cibiyar Horarwa ta Ciutat Esportiva domin yin bankwana da koci Hansi Flick da kuma yan wasan ƙungiyar.
Laporta ya isa cibiyar horon da misalin ƙarfe 9:20 na safe, tare da mai ba shi shawara kuma mamba a kwamitin wasanni, Enric Masip. Shugaban rikon ƙwarya, Rafa Yuste, shima ya iso daga baya.
Tsohon shugaban yayi amfani da wannan damar ne domin ya gaishe da yan wasa da ma’aikatan horaswa cikin natsuwa kafin fara atisayen rana da aka shirya da ƙarfe 11:00 na safe, yayin da Barcelona ke ci gaba da shirin fafatawa da Atletico Madrid a wasan farko na kusa da na ƙarshe na Copa del Rey.
Dangantaka ta musamman da yan wasa
Laporta ya shahara wajen kusantar yan wasa da dakin sauya kaya a tsawon lokacin da yake shugabancin Barcelona. Ziyarar sa zuwa cibiyar horo abu ne da ya zama ruwan dare, musamman domin nuna goyon baya ga koci da yan wasa a lokutan nasara da kuma lokacin ƙalubale.
Wannan mataki na nuna yadda yake da cikakkiyar amincewa da aikin da Hansi Flick da tawagarsa ke yi a kulob ɗin.
Shirin dawowa shugabanci
Daga yanzu, Laporta ya koma matsayin ɗan takara kamar sauran masu neman shugabanci. Zai fara tattara sa-hannun mambobin kulob ɗin domin cika sharuddan da doka ta tanada, da burin sake zama shugaban Barcelona daga ranar 30 ga Yuni mai zuwa.
Rahotanni sun nuna cewa Laporta ya bar saƙo mai ƙarfafa gwiwa ga yan wasa da ma’aikata inda yace
Za mu sake haɗuwa nan ba da jimawa ba, zan yi nasara, kamar yadda ɗan jarida Javi Miguel na AS ya rawaito.
Flick ya mara wa Laporta ba
A cikin dakin sauya kaya kuwa, koci Hansi Flick ya bayyana goyon bayansa ga shirin Laporta na dawo wa shugabanci, tare da Deco a matsayin daraktan wasanni, domin tabbatar da kwanciyar hankali da daidaito a kulob ɗin.
Ba sabon abu ba ne ganin kyakkyawar alaƙa tsakanin Flick da Laporta, inda kocin ɗan Jamus din ke ganin tsohon shugaban a matsayin mutumin da zai iya ci gaba da gina makomar Barcelona.
